შსს – გაეროს ლტოლვილთა უმაღლესი კომისრის ოფისი საქართველოში თავშესაფრის მინიჭების პროცედურას პოზიტიურად აფასებს

0
255

გაეროს ლტოლვილთა უმაღლესი კომისრის ოფისი საქართველოში არსებულ თავშესაფრის მინიჭების პროცედურასა და საერთაშორისო დაცვის სისტემას პოზიტიურად აფასებს.

შინაგან საქმეთა მინისტრი გიორგი გახარია გაეროს ლტოლვილთა უმაღლესი კომისრის ევროპის ოფისის დირექტორს, პასკალ მოროს შეხვდა. შეხვედრას სამხრეთ კავკასიის რეგიონული ოფისის წარმომადგენელიც დაესწრო.

შინაგან საქმეთა სამინისტროს ინფორმაციით, მხარეებმა საქართველოში არსებული საერთაშორისო დაცვის სისტემა განიხილეს, მათ შორის თავშესაფრის მინიჭების პროცედურა, არსებული საუკეთესო პრაქტიკები და საქართველოს გამოცდილება ამ კონტექსტში.

მათივე ცნობით, 2018 წელს განხორციელებული სამთავრობო რესტრუქტურიზაციის შედეგად, თავშესაფრისა და ოკუპირებული ტერიტორიებიდან იძულებით გადაადგილებულ პირთა საკითხები შინაგან საქმეთა სამინისტროს მიგრაციის დეპარტამენტის კომპეტენციაში მოექცა.

„გაეროს ლტოლვილთა უმაღლესი კომისრის ევროპის ოფისის დირექტორმა, პასკალ მორომ გიორგი გახარიასთან შეხვედრაზე პოზიტიურად შეაფასა ის ტენდენცია, რომ საქართველო ავითარებს ამ სისტემას და შინაგან საქმეთა სამინისტროში თავშესაფრის მაძიებელთა საკითხების გადმოსვლის შემდეგ საუკეთესო პრაქტიკა შენარჩუნებულია.

აღსანიშნავია, რომ საქართველოსა და გაეროს ლტოლვილთა უმაღლესი კომისრის ოფისს (გლუკს) სტრატეგიული პარტნიორობა ორ ათეულ წელზე მეტია აკავშირებთ. მათ შორისაა ლტოლვილთა და საქართველოს ოკუპირებული ტერიტორიებიდან დევნილთა საკითხები.

გლუკი საქართველოს მთავრობის მიერ კონტროლირებად ტერიტორიებზე ოპერირებს და წვდომა ოკუპირებულ რეგიონებზეც აქვს. შესაბამისად, მათი წვლილი ჟენევის მოლაპარაკებების მშვიდობიან წარმართვაში მნიშვნელოვანია“, – ნათქვამია შინაგან საქმეთა სამინისტროს მიერ გავრცელებულ ინფორმაციაში.

გააკეთეთ კომენტარი

Please enter your comment!
Please enter your name here