საქართველო და პორტუგალია დროებითი შრომითი მიგრაციის შესახებ თანამშრომლობაზე შეთანხმდნენ

0
300

პორტუგალია მზად არის საქართველოსთან ცირკულარული მიგრაციის სფეროში თანამშრომლობისთვის. ამის შესახებ ინფორმაციას საქართველოს საგარეო საქმეთა სამინისტრო ავრცელებს.

მათივე ცნობით, აღნიშნული საკითხი საქართველოს საგარეო საქმეთა მინისტრმა და პორტუგალიის საგარეო უწყების ხელმძღვანელმა დავით ზალკალიანის ლისაბონში ვიზიტის დროს განიხილეს.

პორტუგალიის მხარემ მზადყოფნა გამოთქვა საქართველოსთან დროებით ლეგალურად დასაქმების საკითხებში თანამშრომლობაზე. კერძოდ, უკვე განისაზღვრნენ შესაბამისი საკონტაქტო პირები და აღნიშნულ საკითხზე იგეგმება საქართველოს დელეგაციის ვიზიტი პორტუგალიაში, რა დროსაც მოხდება თანამშრომლობის შემდგომი ნაბიჯების განსაზღვრა.

როგორც საქართველოს საგარეო უწყების ხელმძღვანელმა აღნიშნა, საქართველოსთვის ევროკავშირის წევრ სახელმწიფოებში ცირკულარული მიგრაციის სფეროში თანამშრომლობის განვითარება პრიორიტეტულია.

უწყების განცხადებით, საფრანგეთთან ხელმოწერილი შეთანხმების შემდეგ, პორტუგალია იქნება ევროკავშირის წევრი კიდევ ერთი ქვეყანა, ვისთანაც საქართველო ამ მიმართულებით შეთანხმებას გააფორმებს. აღინიშნა, რომ ეს კარგი შესაძლებლობა იქნება ქართველი სპეციალისტებისთვის, დასაქმდნენ და კვალიფიკაცია აიმაღლონ. ასევე, შეთანხმება ხელს შეუწყობს მიგრაციული პროცესების დარეგულირებას.

როგორც საქართველოს საგარეო საქმეთა სამინისტროში აღნიშნავენ, ქვეყანა აქტიურად აგრძელებს შრომითი მიგრაციის სფეროში ევროკავშირის წევრ სახელმწიფოებთან თანამშრომლობას. როგორც ცნობილია, უკვე ძალაში შევიდა საქართველოსა და საფრანგეთს შორის ხელმოწერილი შეთანხმება „კვალიფიციური სპეციალისტების ბინადრობისა და ცირკულარული მიგრაციის შესახებ“. მიმდინარეობს აქტიური მუშაობა, რათა უახლოეს მომავალში შეთანხმების პრაქტიკული იმპლემენტაცია დაიწყოს. შრომითი მიგრაციის საპილოტე პროექტი მიმდინარეობს პოლონეთთან. დროებითი შრომითი მიგრაციის ხელშეწყობის მიზნით, მოლაპარაკებები მიმდინარეობს ასევე ისრაელთან და ევროკავშირის სხვა წევრ ქვეყნებთან.

საქართველოს საგარეო საქმეთა მინისტრი დავით ზალკალიანი პორტუგალიის რესპუბლიკას მიმდინარე წლის 21-22 აპრილს ეწვია.

გააკეთეთ კომენტარი

Please enter your comment!
Please enter your name here