„ქართული ოცნება-დემოკრატიული საქართველოს“ მაჟორიტარი დეპუტატობის კანდიდატი თელავსა და ყვარელში, ირაკლი სესიაშვილი მოსახლეობასთან შეხვედრებს განაგრძობს.
”ქართული ოცნების” ინფომაციით, ირაკლი სესიაშვილი ამჯერად სოფელ კონდოლის N23 და N48 საარჩევნო უბნის ამომრჩევლებს შეხვდა. ირაკლი სესიაშვილმა შეკრებილ მოსახლეობასთან „ქართული ოცნება- დემოკრატიული საქართველოს“ გეგმების შესახებ ისაუბრა.
პარტიის ინფორმაციით, ყურადღება გამახვილდა ასევე საყოველთაო ჯანდაცვაზე, სოფლის მეურნეობის პროგრამაზე, განათლებასთან დაკავშირებულ საკითხებსა და ფერმერთა მომსახურების პროგრამაზე. დეპუტატობის კანდიდატმა მოსახლეობას ინფორმაცია მიაწოდა მიწის რეგისტრაციის გამარტივებული წესის შესახებ და აღნიშნა, რომ სულ მალე სახელმწიფოს თანადაფინანსებით, შეღავათიან ფასებში, ადგილობრივი წარმოების ტრაქტორების შეძენა შეეძლებათ.
გარდა ამისა, ირაკლი სესიაშვილმა, შეხვედრაზე მოსახლეობასთან ერთად განიხილა სოფელში ჯერ კიდევ არსებული პრობლემები და მათი მოგვარების გზებზე ადგილობრივებთან ერთად იმსჯელა.
„ქართული ოცნება-დემოკრატიული საქართველოს“ მაჟორიტარი დეპუტატობის კანდიდატის განცხადებით, ყველა საკითხი მოსახლეობის ჩართულობით გადაწყდება.
